Inabutan ng PEP (Philippine Entertainment Portal) si Dingdong Dantes kasama si Piolo Pascual sa isang function room sa Crowne Plaza Ortigas, kung saan ginanap ang launching ng bago nilang endorsement na facial product last Thursday, September 18.
May benda pa ang kanang kamay ni Dingdong nang makausap namin siya after ng one-on-one session interview niya sa ilang broadsheet.
"Naaksidente ako sa taping," bungad ni Dingdong sa amin.
Inalam agad namin kay Dingdong kung ano ang pakiramdam niya na katabi si Piolo sa isang event tulad ng launching-presscon nila for a certain product.
"Siyempre, a different feel, different atmosphere. Parang it's a fresh slate because we're here in a product together who came from different networks. Very fresh and para sa akin, very great experience."
Kumusta naman ang naging working relationship nila ni Piolo? Nagkaroon ba sila ng bonding moments?
"Kung sa bonding, wala pa masyado kasi isang araw lang kaming nagkasama sa shooting ng commercial. Pero I'm looking forward naman to doing projects aside from this later on."
What was his initial reaction nang malaman niya na magkakasama sila ni Piolo for an endorsement?
"Sa akin it's an honor. Para makasama at, kumbaga, magkaroon ng equal footing sa isang very respected and, kumbaga, high-ranking co-actor."
Ano ang naging impression niya kay Piolo sa isang araw na nagkatrabaho sila?
"Ano, very down to earth. Very professional."
Nagkaroon din daw sila ng chance ni Piolo na magkausap.
"Pinag-usapan namin yung kagandahan ng industriya natin at ano pa ang possibilities of doing it better."
Napag-usapan din ba nila ang possibility of doing something together na isang proyekto?
"Hindi naman namin directly napag-usapan, pero siyempre ako, it's an option that I would really want to consider. Although hindi naman talaga namin napapag-usapan in detail personally, pero it's a possibility."
Nauna nang nakasama ni Dingdong sa isang endorsement product ang isang Kapamilya na si Angelica Panganiban; this time, si Piolo naman. Interestingly, nakasama na rin ni Piolo ang ka-love team ni Dingdong na si Marian Rivera sa isang endorsement. Ano ang masasabi ni Dingdong dito?
"It's how we evolved na, e. Na hindi lang limited sa kanya-kanyang istasyon. You know, we get to work with our co-actors over the bakod," saad ni Dingdong.
Hindi ba sila nagkaroon ng problema sa billing o kung sino ang mauuna sa kung anuman?
"Wala, walang-wala," sagot ni Dingdong. "And kung meron man, I would give way. I mean, I would definitely salute and give high regard. For me, there's no issue kung siya ang mauna sa billing. He deserves that more than I do."
What about talent fee? Sino ang mas malaki?
"Hindi ko na alam yun. Sila na ang bahala sa mga ganyan," nakangiti niyang sabi.
Nangangarap ba siya na makagawa rin ng pelikula sa Star Cinema, tulad ni Richard Gutierrez, na nakasama ni KC Concepcion sa For The First Time?
"Hindi naman," sabi ni Dingdong. "I would want to do a movie with GMA Films first. And yung sa Star Cinema if they want me, sana. Why not? I mean, if it was already a possibility, of course, my doors are open."
Nakakontrata pa raw si Dingdong ngayon sa GMA Films. Last Thursday rin naganap ang story conference para sa first film nila ni Marian Rivera sa GMA Films, ang One True Love. Kasama rin nila rito si Iza Calzado na nakatambal na ni Dingdong sa mga pelikulang Moments of Love at Eternity.
Ano naman ang reaksiyon ni Dingdong sa sinabi ng isa pang Kapamilya na si John Lloyd Cruz na gusto nitong makapareha si Marian?
"I won't be surprised. I mean, everyone would want to be her partner. And I'm glad I'm the first and I was with her at her best," sambit ni Dingdong.
What about him? Sino ang gustong makapareha niya na artistang babae sa Kapamilya network?
"Sa akin kahit sino ang ibigay, ayokong mamili," maikling sagot ni Dingdong.