Inilabas ng National Bureau of Investigation (NBI) ang CCTV footage na kuha kay Sandro Muhlach kaugnay ng inirereklamo niyang sexual abuse na naranasan umano niya.
Read: Sandro Muhlach speaks up about sexual abuse
Sangkot dito ang dalawang respondents na sina Jojo Nones at Richard "Dode" Cruz, na parehong independent contractors ng GMA-7 na nasuspinde dahil sa ongoing investigation.
Naganap umano ang insidente noong madaling-araw ng July 21, 2024 sa hotel room na kinalulugaran nina Nones at Cruz.
Read: GMA-7 names "independent contractors" in Sandro Muhlach incident
Magkatapat ang hotel kung saan naka-check in si Sandro at ang hotel kung nasaan ang dalawang respondents.
Eksaktong 4:39 A.M. namataan si Sandro na lumabas ng kanyang hotel room.
Makikitang suot nito ang rolled-up black button-down shirt at black pants maliban sa blazer na suot nito sa GMA Gala 2024.
Ang program ng GMA Gala 2024 ay natapos bandang 11:30 P.M. ng July 20.
Nakunan ng CCTV si Sandro na naglalakad mula sa hotel niya papunta sa katapat na hotel kung nasaan sina Nones at Cruz.
Eksaktong 4:47 A.M. nang dumating si Sandro sa hallway tapat ng hotel room nina Nones at Cruz.
Bandang 5:24 A.M. nang may makitang attendant na naghatid ng inumin sa hotel room nina Nones at Cruz.
Nasa loob pa rin ng hotel room si Sandro noong mga oras na iyon.
Eksaktong 6:46 A.M. nang mamataan si Sandro na lumabas ng kuwarto ng respondents.
Eksaktong 6:53 A.M. naman nang dumating si Sandro sa lobby ng hotel kung saan siya naka-check in.
Ang CCTV findings ay base sa ulat ni Oscar Oida sa GMA-7 primetime newscast na 24 Oras ngayong Huwebes ng gabi, August 22.
Read: Niño Muhlach gets emotional at Senate hearing on son's ordeal
NBI CLAIMS CCTV FOOTAGE SHOWS SANDRO MUHLACH'S "TRAUMA"
May interpretasyon ang behavioral science division ng NBI sa nakitang kilos ni Sandro base sa CCTV footage.
Ayon sa agent on case na si Zulikha Marie Conales, "makikitang nagbago yung kanyang kilos" matapos ang insidente ng diumano'y pangmomolestiya kay Sandro.
Noong papunta pa lang siya sa hotel ng respondents ay "normal at relaxed ang movement ni Sandro."
Pero saad ni Conales, pagkatapos ng alleged incident ay "distressed at very anxious" na ang binata.
Ipinunto rin ng NBI agent na makikitang "balisa" si Sandro dahil sa bilis ng lakad at "bigla na lang siyang umupo sa tabi ng wall" sa tapat ng elevator.
Hinihintay raw ni Sandro na dumating ang mga kaibigang sumundo sa kanya noong mga oras na iyon.
Pagsusuma ni Agent Conales: "This is very consistent sa finding ng bureau na mayroong traumatic event na nangyari doon sa hotel kung saan naka-check in yung dalawang subjects na nirereklamo ni Sandro."
Ayon sa ulat ng 24 Oras, sinabi ng abogado ng respondents na hindi pa nakikita ng kanilang kampo ang CCTV footage na nakuha ng NBI mula sa hotel ni Sandro at sa hotel ng respondents.
Hindi pa rin nakunan ng pahayag ang ama ni Sandro na si Niño Muhlach.
Read: Sandro Muhlach, nakararanas umano ng trauma at PTSD
SANDRO MUHLACH'S NARRATION
Sa pagdinig sa Senado noong August 19, Lunes, isinalaysay ni Sandro ang aniya'y seksuwal na pang-aabusong dinanas niya.
Inamin ni Sandro na matinding trauma ang idinulot sa kanya ng insidente at nahirapan siyang ipagtapat ang nangyari hindi lang sa pulisya kundi maging sa kanyang mga magulang.
"Kahit po sa papa ko, nahirapan po akong magsabi. Umiiyak po ako sa harap niya.
"Kasi napakahirap po tanggapin na binaboy ka. Hinarass ka, lahat po ng bagay na yon, para ka pong inaapak-apakan. So, parang nakakababa ho.
“Nakakatakot po talagang magsumbong. Ako nga po, inabot ako ng sampung araw bago po ako magsabi, mag-report," saad ni Sandro.
Inamin din ni Sandro na natakot siyang maapektuhan ang career niya bilang GMA artist.
Sa loob ng tatlong taon mula nang pumasok siya sa industriya ay pinakasamahan daw niya nang maayos ang lahat ng mga boss niya sa network.
Umaasa si Sandro na makuha niya ang hustisyang hangad niya.
Dagdag niya, "Kasi hindi naman lahat may kakayahan na magsumbong freely. Kasi, puwede po silang balikan ng perpetrators na gumawa ng case na yon."
Nanindigan si Sandro na inabuso siya ng itinuturo niyang respondents.
Aniya, si Cruz ang kakilala at kapalitan niya ng mensahe nang magdesisyon siyang magpunta sa hotel room ng respondents.
Si Cruz ay noon lang daw niya nakilala.
Dumalo si Sandro via virtual participation sa Senate hearing.
JOJO NONES AND DODE CRUZ DENY ALLEGATIONS AGAINST THEM
Personal namang dumating sa pagdinig sa Senado sina Nones at Cruz noong August 12 at August 19.
Read: Jojo Nones, Dode Cruz deny allegations of Sandro Muhlach
Dito ay nanindigan sina Nones at Cruz na walang katotohanan ang alegasyong ibinabato sa kanila ni Sandro.
Bahagi ng pahayag ni Cruz noong August 12: "Opo, kami po ang independent contractors ng GMA Network na tinutukoy sa mga online post na kumalat noon mga nakaraang araw.
"Subalit, hindi po kami gumawa ng anumang sexual harassment or abuse laban kay Sandro Muhlach.
"Sa pagkakataong ito, sa harap ninyong lahat, mariin pong itinatanggi namin ang lahat ng mapanirang akusasyon na ito laban sa amin."
Umapela rin silang huwag sila agad husgahan ng publiko, lalo't hindi pa pinal ang imbestigasyon sa insidente.
Noong August 19, paulit-ulit na pinabulaanan ni Nones na hindi nila inabuso ni Cruz si Sandro.
Ito ay sa kabila ng mainit na pagtatanong ni Senate President Pro Tempore Jinggoy Estrada.
Ayon kay Nones, "kuwentuhan" at "socializing" lamang ang ginawa nila sa loob ng hotel room. Nakakapag-text pa raw "freely" si Sandro.
Idiniin din ni Nones na walang "direct invitation" mula sa kanya na magpunta si Sandro sa hotel room na kinaroroonan nila ni Cruz. Kusa raw na nagpunta roon si Sandro.
Hindi kumbinsido si Senator Jinggoy sa salaysay ni Nones.
Sa Senate hearing na iyon noong August 19 nagmosyon si Jinggoy na patawan ng contempt si Nones dahil sa "pagsisinungaling" nito.
Read: Sen. Jinggoy Estrada, dinalaw sa Senate detention si Jojo Nones
Rape through sexual assault at multiple counts of acts of lasciviousness ang mga reklamong inihain ni Sandro laban kina Nones at Cruz.
Isinumite ni Sandro ang reklamo sa Department of Justice noong umaga ng August 19.
Read: Sandro Muhlach naghain ng reklamong rape, acts of lasciviousness