Dalawang beses makapagsasalita ang isang kandidato na  sa harap ng audience.

Sa unang pagkakataon ay makakatapat niya ang isa pang kandidato at tatanungin sila ukol sa isang problema o issue na kinakaharap ng bansa. Dito makikita ng manonood kung paano malulutas ng kandidato ang mga pangunahing suliranin ng lipunan.

Sa ikalawang pagkakataon, tatanungin ng mga batikang broadcast journalists na sina Howie Severino at Jessica Soho; Philippine Investigative Journalism (PCIJ) director Malou Mangahas; at ng broadcast journalist/economist Winnie Monsod ang bawat kandidato ukol sa mga platapormang sinusulong nila.

Makikita sa gitna ng entablado si Jessica Soho na nagsilbing main host ng GMA News TV election special.

Naging mabusisi sa pagtatanong at matapang sa paghamon sa mga kandidato ang mga miyembro ng panel. (L-R): Mareng Winnie Monsod, Malou Mangahas, at Howie Severino.

Unang pinagtapat sa unang bahagi sina Senator Francis "Chiz" Escudero at dating senador na si Gringo Honasan. Saan nga ba nila gagamitin ang nakalaang pork barrel (o pondong galing sa kaban ng bayan na nakalaan sa pagtustos ng local government para sa mga proyekto) sakali mang manalo sila sa election?

Ayon kay Senator Escudero, kasalukuyang ginagamit niya ang pork barrel sa paggawa ng regional hospitals at mga paaralan.

Gagamitin naman daw ni Gringo Honasan ang pondo para sa pakain, pabahay, paggawa ng kalsada, at mga proyekto para sa kabataan.

Ang problema sa kahirapan naman ang sumunod na ibinatong issue kay dating Bukidnon representative Miguel Zubiri at Puerto Prinsesa mayor Edward Hagedorn. Anong tulong nga ba ang maibibigay nila sa mahihirap?

Naunang sumagot si Mayor Hagedorn at ibinida ang pag-unlad sa Puerto Prinsesa dahil sa mga community-based projects na kanyang inulunsad sa probinsya.

Ayon naman kay Migz Zubiri, gagawin niyang advocacy ang universal health care.

Naging exciting ang harapan ng dalawang babaeng pulitiko: former Akbayan representative Risa Hontiveros-Baraquel at Zambales congresswoman Mitos Magsaysay. Kilala si Risa sa pagsulong ng RH Bill (o Responsible Parenthood and Reproductive Health Act 2012), habang nasa oposisyon naman ng kontrobersyal na batas ang pangalawang opisyal.

Ang suliraning ibinato sa dalawa ay tungkol sa lumalaking populasyon ng Pilipinas na naitalang nasa 95 million, isa sa pinakamataas na bilang ng tao sa Asya.

Ayon kay Representative Mitos, mga tamang programa lamang ang solusyon sa malaking populasyon ng bansa "to make people productive!" Dapat raw palakasin ang education sector, lalo na ang tertiary level, na magiging daan para sa mga mamayaman upang makakuha ng trabaho.

Para kay dating representative Risa, ang patuloy na pagsuporta sa RH Bill, na ngayon ay isang batas na, ang solusyon sa lumulobong populasyon ng Pilipinas. Hindi lamang makakatulong ito sa pagpigil sa paglaki ng bilang ng tao kundi pati na rin sa pagpapa-unlad ng "quality of life" ng bawat Pilipino.

Sumunod na pinagtapat naman sina Aurora representative Sonny Angara at Ausphil Tollways Corporatio  president at CEO na si Ricardo Penson. Isang tanong mula sa isang magsasakang nagngangalang Apin Suarez ang ibinato sa dalawang kandidato: "Ano ang gagawin niyo para makabangon sa hirap ang mga magsasaka?"

Dapat na ibalik sa agrikultura ang atensiyon ng gobyerno, wika ni Ricardo Pengson.

Samantala, nais isulong ni congressman Sonny ang paglaan ng 20 million budget na nakapaloob sa Agriculture Modern Act.

Dahil kapwa beterano na sa senado, tinanong sina dating Senator Ernesto Maceda at Ramon Magsaysay Jr. kung ano pa ang nais nilang gawin sakaling palaring manalo sa midterm elections.

Pagbibigay ng capital o pondo sa bawat Pilipino upang magkaroon ng panimula—ito ang nais gawin ni Magsaysay.

Nais namang tugunan ni Maceda ang kawalan ng trabaho. Magiging prayoridad daw nito ang agrikultura kaysa sa turismo, at dadaggdagan ang pension o allowance ng bawat senior citizen.

Ang kapwa baguhan na sina Kapatiran president JC Delos Reyes at former Manila councilor Greco Belgica ang pinagharap sa unang pagsubok. Sila naman ay tinanong kung anong mga batas ang nais nilang ipasa sakali mang manalo sa eleksyon.

Nais ipatupad ni Belgica ang Flat Tax Rate, o ang uniform tax rate, kung saan hindi aangat sa 10 percent sa kinikita ng tao ang ikakaltas na buwis.

Naniniwala naman si Delos Reyes na hindi na kailangan pa ng panibagong mga batas. Aniya, dapat na ipasa ang mga bills na hanggang ngayon ay hindi pa naaaprubahan.

Sa ikalawang round ng pagsubok, unang sinabak si Aurora representative Sonny Angara, na tinanong ni Jessica Soho ukol sa namamayagpag na political dynasties. Ayon sa anak ni Sen. Edgardo Angara, dapat tingnan ng bawat botante ang credentials ng isang kandidato, hindi ang pangalan. "We have no intention to perpertuate ourselves," wika pa nito.

Kinuwestiyon naman ni Winnie Monsod ang Flat Tax Rate na isinusulong ni Greco Belgica. Ayon sa saliksik ng ekonomista ay mas pabor daw sa mayayaman ang bill.

Wika naman ng dating konsehal ng Manila, ayon sa kanyang saliksik, tatlo hanggang apat na porsiyento lamang ng mamamayang Pilipino ang nagbabayad ng tamang buwis. Magiging patas ang koleksiyon ng buwis sa pamamagitan ng Flat Tax Rate dahil lahat ay magbabayad nang tama.

Tinanong naman ni Malou Mangahas ang Kapatiran president na si JC Delos Reyes kung ito ba ay sang-ayon sa family planning.

Idiniin ni Delos Reyes na ang Kapatiran, isang Christian Democratic group, ay hindi sumasang-ayon sa RH bill na magpapatupad ng family planning.

Ayon kay Delos Reyes, ang naturang batas ay makasisira sa moralidad ng tao.

Gusto niyang ma-repeal ang RH bill sakaling manalo sa pagkasendor. Hindi raw solusyon ang pag-minimize ng mahihirap kundi tulungan sila.

Nagkakaroon nga ba ng separasyon ang pribadong buhay ni Sen. Francis Escudero sa kanyang propesyunal na buhay lalo pa't kumpirmadong kasintahan na nito ang batang actress na si Heart Evangelista? Ito ang hamon na tanong sa kanya ni Howie Severino.

Natatawang sinagot ng senador na ni minsan ay hindi naaapektuhan ng kanyang private life ang kanyang trabaho bilang pulitiko. "Walang kinalaman ang personal sa trabaho," diin ng senador.

Totoo nga bang may kamay na bakal si Puerto Prinsesa Mayor Edward Hagedorn? Nakangiting sinabi ni Hagedorn na naniniwala siya sa "justice with compassion."

Dahil kilala si former Akbayan representative Risa Hontiveros-Baraquel sa kanyang advocacy para sa kababaihan, kinuwestiyon ni Malou Mangahas kung mayroon ba itong sinusuportahang mga batas na hindi para lamang sa mga babae.

Sinabi ni Hontiveros na sang-ayon ito sa Gun Ban law at sa pagsulong ng Sin Tax bill.

Nilinaw din ng political activist na hindi "sipsip" ang Akbayan kay PNoy kahit pa ang kanilang party ang tanging sumusuporta sa "tuwid na daan" ni PNoy.

Isa si former Senate President Ernesto Maceda sa mga lumagda sa covenant against media corruption. Gaano nga ba kalaganap ang katiwalaan sa media, sa pananaw nito? Wika ng dating pulitiko, hindi lahat ng miyembro ng media ay corrupt. Naniniwala ito na dapat ihinto ang media payroll.

Tinanong ni Jessica Soho si Zambales representative Mitos Magsaysay ukol sa mga taong bumabatikos sa kanya dahil siya raw ay malapit na alyansa ng dating pangulong Gloria Macapagal Arroyo.

Matapang na sinagot ni Magsaysay na hindi dapat maging basehan ang asosasyon ng isang kandidato sa nakaraang pulitiko. Bagkus, dapat na tutukan ng botante ang track record ng kandidato.

Si Mitos Magsaysay ay nagantimpalaan ng Most Outstanding Congressperson ng anim na beses simula 2005.

Tinimbang nga ba ngunit kulang?

Kinuwestiyon naman ni Malou Mangahas ang "kakulangan sa karanasan" ni Ricardo Pengson sa pulitika. Sinabi ng Ausphil Tollways CEO na may tama siyang kaalaman sapagkat nakapagtrabaho ito sa parehong pribado at publikong sektor ng bansa.

Matatandaang nag-resign si Miguel Zubiri sa pagiging senador dahil sa mga alegasyong parte ito sa poll fraud sa senate elections noong 2007. Ano ang masasabi nito na baka maulit ang dayaan ngayong nararating na May 2013 elections?

Wika ng dating senador, hindi na dapat balikan ang manual voting. Bagamat hindi perpekto ang automated elections, "walang human intervention" ang paraang ito.

Ang unang 12 senatorial candidates na sumabak sa pagsubok.

(CLICK HERE to view part 2)